മുംബൈയിലെ ആഡംബരത്തിന്റെ കൊടുമുടി: ശില്‍പ്പ ഷെട്ടിയുടെ ‘ബാസ്റ്റ്യൻ’ റെസ്റ്റോറന്റിലെ ഒരു ദിവസത്തെ വരുമാനം 3 കോടി!

മുംബൈ: ബോളിവുഡ് നടി ശിൽപ്പ ഷെട്ടിയുടെ ഉടമസ്ഥതയിലുള്ള ആഡംബര റെസ്റ്റോറന്റായ ‘ബാസ്റ്റ്യൻ അറ്റ് ദ ടോപ്പ്’ (Bastian At The Top) ഒരു രാത്രികൊണ്ട് കോടികൾ വാരിക്കൂട്ടുന്നുവെന്ന ഞെട്ടിക്കുന്ന വെളിപ്പെടുത്തലുമായി പ്രശസ്ത എഴുത്തുകാരി ശോഭാ ഡേ രംഗത്ത്. മാധ്യമപ്രവർത്തകയായ ബർഖാ ദത്തിന് നൽകിയ അഭിമുഖത്തിലാണ്, മുംബൈയിലെ നൈറ്റ് ലൈഫിനെക്കുറിച്ചുള്ള ഈ അവിശ്വസനീയമായ കണക്കുകൾ ശോഭാ ഡേ തുറന്നുപറഞ്ഞത്.
​മുംബൈ നഗരത്തിലെ ആഡംബരത്തിന്റെ പര്യായമായി കണക്കാക്കപ്പെടുന്ന ‘ബാസ്റ്റ്യൻ’ ദാദറിലാണ് സ്ഥിതി ചെയ്യുന്നത്. നഗരത്തിന്റെ ഏറ്റവും മനോഹരമായ കാഴ്ചകൾ സമ്മാനിക്കുന്ന 48-ാം നിലയിലാണ് ഈ റെസ്റ്റോറന്റ് പ്രവർത്തിക്കുന്നത്. ബാന്ദ്ര-വോർളി സീ ലിങ്കിൻ്റെയും മുംബൈ നഗരത്തിൻ്റെയും 360 ഡിഗ്രി കാഴ്ച ഇവിടെ നിന്ന് ആസ്വദിക്കാനാകും.
​വരുമാനം 3 കോടി കടക്കും
​മുംബൈയിലെ ഒരു റെസ്റ്റോറന്റിന്റെ പ്രതിദിന വരുമാനം എത്രത്തോളമുണ്ടെന്ന് വ്യക്തമാക്കുമ്പോഴാണ് ശോഭാ ഡേ ഈ ഞെട്ടിക്കുന്ന വിവരം പങ്കുവെച്ചത്. “മുംബൈയിൽ ഒറ്റ രാത്രികൊണ്ട് 2 കോടി മുതൽ 3 കോടി രൂപ വരെ വരുമാനം നേടുന്ന ഒരു റെസ്റ്ററന്റുണ്ട്. സാധാരണ ദിവസങ്ങളിൽ ഇവിടുത്തെ വരുമാനം 2 കോടിയും, വീക്കെൻഡുകളിൽ 3 കോടിയോ അതിൽ കൂടുതലോ ആയിരിക്കും,” അവർ പറഞ്ഞു.
​ഈ കണക്കുകൾ കേട്ടപ്പോൾ അത് വിശ്വസിക്കാൻ തനിക്ക് സാധിച്ചില്ലെന്നും, അതിൻ്റെ നിജസ്ഥിതി അറിയാൻ താൻ നേരിട്ട് റെസ്റ്റോറന്റ് സന്ദർശിച്ചതായും ശോഭാ ഡേ കൂട്ടിച്ചേർത്തു. പിന്നീടാണ് അവർ ആ സ്ഥാപനത്തിൻ്റെ പേര് വെളിപ്പെടുത്തിയത്: “അത് മറ്റാരുമല്ല, ‘ബാസ്റ്റ്യൻ അറ്റ് ദ ടോപ്പ്’ ആണ്.”
​സെലിബ്രിറ്റികളുടെ പ്രിയ കേന്ദ്രം
​ആഗോള നിലവാരത്തിലുള്ള വിഭവങ്ങളും ലക്ഷ്വറി അംബിയൻസും കാരണം ‘ബാസ്റ്റ്യൻ’ മുംബൈയിലെ പ്രമുഖ സെലിബ്രിറ്റികളുടെയും ധനികരുടെയും ഇഷ്ടപ്പെട്ട ഇടമാണ്. വിദേശ രാജ്യങ്ങളിലെ ക്ലബ്ബുകളോട് കിടപിടിക്കുന്ന അത്യാഢംബരമായ ഇന്റീരിയറാണ് ഇതിൻ്റെ പ്രത്യേകത.
​ഇവിടെ പ്രവേശിക്കുന്നതിന് ‘സ്മാർട്ട് കാഷ്വൽ’ ഡ്രസ് കോഡ് അടക്കമുള്ള കർശനമായ നിബന്ധനകളുണ്ട്. അതോടൊപ്പം, ടേബിൾ റിസർവേഷനായി വ്യക്തിഗതമായി ഉയർന്ന തുക ഡെപ്പോസിറ്റായി ഈടാക്കുകയും അത് ബില്ലിൽ ക്രമീകരിക്കുകയും ചെയ്യുന്ന രീതിയാണ് ഇവിടെ പിന്തുടരുന്നത്. ഇത് മുംബൈയുടെ രാത്രി ജീവിതത്തിൽ ബാസ്റ്റ്യൻ നേടിയ ഉയർന്ന സ്ഥാനം അടിവരയിടുന്നു.