ഒന്നും ഒളിക്കാനില്ല: പ്രിയപ്പെട്ട സംവിധായകൻ രാജ് നിദിമോരുവിനെ ആലിംഗനം ചെയ്ത് സമാന്ത, പ്രണയവാർത്തകൾക്ക് സ്ഥിരീകരണം നൽകിയോ? സോഷ്യൽ മീഡിയയിൽ വൈറലായി ചിത്രം!

ചെന്നൈ: തെന്നിന്ത്യൻ സിനിമാലോകത്തെ ശ്രദ്ധാകേന്ദ്രമായ നടി സമാന്ത റൂത്ത് പ്രഭുവും പ്രശസ്ത സംവിധായകൻ രാജ് നിദിമോരുവും തമ്മിലുള്ള പ്രണയബന്ധത്തെക്കുറിച്ചുള്ള അഭ്യൂഹങ്ങൾ സത്യമായി മാറുന്നുവോ? ഇരുവരും ഒന്നിച്ചുള്ള ഒരു ചിത്രം സമാന്തയുടെ ഔദ്യോഗിക ഇൻസ്റ്റാഗ്രാം പേജിൽ പോസ്റ്റ് ചെയ്തതിന് പിന്നാലെ ആരാധകർക്കിടയിലും സിനിമാ ലോകത്തും വലിയ ചർച്ചകൾക്കാണ് തിരികൊളുത്തിയിരിക്കുന്നത്. ‘ഒന്നും ഒളിക്കാനില്ല’ (Nothing to hide) എന്നൊരു ഹാഷ്ടാഗ് കൂടി പോസ്റ്റിനൊപ്പം ചേർത്തതോടെയാണ് പ്രണയവാർത്തകൾക്ക് സ്ഥിരീകരണമായോ എന്ന ആകാംഷ ശക്തമായത്.
​തന്റെ പുതിയ പെർഫ്യൂം ബ്രാൻഡിന്റെ ലോഞ്ച് ചടങ്ങിൽ നിന്നുള്ള ചിത്രങ്ങളാണ് സമാന്ത സോഷ്യൽ മീഡിയയിൽ പങ്കുവെച്ചത്. സുഹൃത്തുക്കളോടും കുടുംബാംഗങ്ങളോടുമൊപ്പം സന്തോഷം പങ്കിടുന്ന നിരവധി ചിത്രങ്ങൾക്കൊപ്പമാണ് രാജ് നിദിമോരുവിനെ ആലിംഗനം ചെയ്ത് നിൽക്കുന്ന ഈ ചിത്രവും താരം പോസ്റ്റ് ചെയ്തത്.
​സമാന്തയുടെ കുറിപ്പിലെ ഉള്ളടക്കം ഇതാണ്:
”ചുറ്റും സുഹൃത്തുക്കളും കുടുംബാംഗങ്ങളും. കഴിഞ്ഞ ഒന്നര വർഷമായി, എൻ്റെ കരിയറിലെ ഏറ്റവും ധീരമായ ചില ചുവടുകളാണ് ഞാൻ എടുത്തത്. വെല്ലുവിളികൾ ഏറ്റെടുക്കുന്നു, ഉൾപ്രേരണയെ വിശ്വസിക്കുന്നു, മുന്നോട്ട് പോകുമ്പോൾ പഠിക്കുകയും ചെയ്യുന്നു. ഇന്ന്, ഞാൻ ചെറിയ വിജയങ്ങൾ ആഘോഷിക്കുകയാണ്. എൻ്റെ ജീവിതത്തിൽ ഞാൻ കണ്ടുമുട്ടിയതിൽ വച്ച് ഏറ്റവും മിടുക്കരും കഠിനാധ്വാനികളും ആത്മാർഥതയുള്ളവരുമായ ചില ആളുകളോടൊപ്പം പ്രവർത്തിക്കാൻ കഴിഞ്ഞതിൽ ഞാൻ ഒരുപാട് നന്ദിയുള്ളവളാണ്. വലിയ വിശ്വാസത്തോടെ, ഇതൊരു തുടക്കം മാത്രമാണെന്ന് എനിക്കറിയാം.”
​പ്രൊഫഷണൽ നേട്ടങ്ങളെക്കുറിച്ച് താരം വാചാലയായെങ്കിലും, അവസാനം ചേർത്ത രാജ് നിദിമോരുവിനൊപ്പമുള്ള ചിത്രം സമാന്തയുടെ വ്യക്തിജീവിതത്തിലേക്കാണ് ശ്രദ്ധ തിരിക്കുന്നത്. ‘ഫാമിലി മാൻ 2’ (The Family Man 2) എന്ന ഹിറ്റ് വെബ് സീരീസിലൂടെ ഇരുവരും ഒരുമിച്ച് പ്രവർത്തിച്ച സമയം മുതൽ തന്നെ ഇവർ പ്രണയത്തിലാണെന്ന ഗോസിപ്പുകൾ സിനിമാ ലോകത്ത് സജീവമായിരുന്നു. കഴിഞ്ഞ വർഷം അമേരിക്കയിൽ ഇരുവരും ഒന്നിച്ചുള്ള അവധിക്കാല ചിത്രങ്ങൾ പുറത്തുവന്നതും ഈ ബന്ധത്തിന് ആക്കം കൂട്ടി.
​2021-ൽ നടൻ നാഗചൈതന്യയുമായി വേർപിരിഞ്ഞതിന് ശേഷം സമാന്തയുടെ ജീവിതത്തിലെ നിർണ്ണായകമായൊരു നീക്കമായാണ് ആരാധകർ ഈ ചിത്രത്തെ കാണുന്നത്. ജീവിതത്തിലെ പ്രതിസന്ധികളെ ധീരമായി നേരിട്ട സമാന്ത, ഇപ്പോൾ വ്യക്തിപരമായ സന്തോഷങ്ങളെയും ഒളിച്ചുവെക്കാതെ പ്രഖ്യാപിക്കുന്നതിലുള്ള ആത്മവിശ്വാസമാണ് ‘ഒന്നും ഒളിക്കാനില്ല’ എന്ന ഹാഷ്ടാഗിലൂടെ ലോകത്തോട് വിളിച്ചു പറയുന്നത്. ഏതായാലും, ഇരുവരുടെയും ഭാഗത്ത് നിന്ന് ഒരു ഔദ്യോഗിക സ്ഥിരീകരണം ലഭിക്കുന്നത് വരെ സിനിമാ പ്രേമികൾ ആകാംഷയോടെ കാത്തിരിക്കും.